Американски сенатори постигнаа договор за Обамакер, Трамп го поддржа

Двајца водечки американски сенатори, од редовите на републиканците и демократите, постигнаа меѓупартиски договор за продолжување на финансирањето на сојузните субвенции за здравствено осигурување, со што спорниот закон на претходниот претседател Барак Обама, кој Доналд Трамп се обидува да го урне, ќе добие уште две години.

Американскиот претседател Доналд Трамп му даде поддршка на постигнатиот договор практично веднаш штом беше најавен, иако нагласи дека сепак ќе се обиде да го урне Обамакер.

Републиканскиот сенатор Ламар Александер од Тенеси и демократската сенаторка Пети Мареј од Вашингтон, челници на комисијата за здравство при американскиот Сенат, соопштија дека постигнале договор за двегодишно продолжување на субвенционирањето на осигурителите за полисите на осигурениците со послаб имотен статус. Трамп минатата недела потпиша указ со кој се укинува ова субвенционирање.

Со договорот им се даваат поголеми овластувања на сојузните држави во експериментирањето со алтернативни стандарди на пакети на осигурување, но задржувајќи го условот за еднакви цени на премија за болните и за здравите. Договорот не ги исклучува т.н. основни здравствени услуги, како што се оние кои се однесуваат на ментално здравје и бременост, а кои секој осигурителен пакет мора да ги поседува.

- Со ова ги решаваме следните две години. Потоа можеме да имаме сеопфатна расправа за тоа кон што се стремиме долгорочно гледано кога е во прашање здравственото осигурување, изјави Александер по потпишувањето.

Обвинувајќи го Трамп за „саботажа на здравствениот систем“ на САД, Мареј изјави дека и е драго што „демократите и републиканците се согласуваат дека такво нешто е неприфатливо и оти неизвесноста и дисфункционалноста не смеат да продолжат“. 

Администрацијата на Трамп, минатата недела најави запирање на исплатата на милијарди долари субвенции за осигурителите за здравственото осигурување на сиромашните граѓани. Тоа е дел од настојувањата на републиканскиот претседател да го урне законот за здравствено осигурување, осмислен од Обама и меѓу народот познат како Обамакер