Акиевска и Илиевски најдобри македонски спортисти во 2023

Македонската бодибилдерка Мери Акиевска во женска и кикбоксерот Бобан Илиевски во машка конкуренција ги освоија признанијата на традиционалниот, 69. по ред, „Избор на спортисти на годината“ што вечерва заеднички го организираа Агенцијата за млади и спорт (АМС) и Сојузот на спортски федерации.

Наградата за најдобар македонски спортист во годината која изминува Илиевски ја заслужи со освоениот златен медал на Светското првенство во Португалија во категоријата лоукик до 86 килограми.

- Повеќе од десет години ми беа потребни за да станам светски првак. Ветувам дека и во иднина ќе ја претставувам Македонија во најдобро светло на најголемите светски натпреварувања, порача Илиевски.

Во женска конкуренција, Акиевска со освоениот златен медал на Светското првенство во Шпанија, го повтори успехот од 2021 кога, исто така, беше прогласена за македонска спортистка на годината.

Избор на спортисти на годината:

Спортист на годината: Бобан Илиевски кикбокс

Спортистка на годината: Мери Акиевска фитнес и боди билдинг

Најуспешна национална спортска федерација: Одбојкарска федерација на Македонија

Најуспешен тренер/селектор: Дејан Мирковски – Кикбокс Маитаи

Најуспешен машки национален тим: Македонската сениорска одбојкарска репрезентација

Најуспешен женски национален тим: Македонската сениорска ракометна репрезентација

Млад спортист на годината: Витомир Трајковски – карате

Млада спортистка на годината: Милијана Релиќ – таеквондо

Најуспешен спортист со инвалидитет: Андреј Стојановски – пливање

Најуспешна спортска универзитетска екипа: Машки карате тим од Универзитетот „Св. Кирил и Методиј“ од Скопје

Најуспешен училишен спортски клуб од средните училишта: УСК СОУ „Никола Карев“ од Скопје

Најуспешен училишен спортски клуб од основните училишта: ОУ „Свети Климент Охридски“ од Битола.

Благодарница за „Спорт клуб ТВ“, „Спорт клуб Нетворк“ и Продукција Белград за документарниот филм „Патот на Кобра до ѕвездите“ посветен на животот и кариерата на легендата на македонскиот фудбал.