Зеќири не се чувствува виновен - одбраната тврди дека го штител буџетот

Поранешниот генерален секретар на Владата, Мухамед Зеќири не се чувствува виновен за кривичното дело злоупотреба на службената положба. 

-Не се чувствувам виновен, кратко кажа Зеќири. 

Одбраната тврди дека тој не го сторил кривичното дело кое му се става ва товар. Адвокатот Владимир Андреевски рече дека обвинителниот акт е полу-политички говор и оти очекува ослободителна пресуда. 

-Одбраната ќе докаже дека обвинетиот не го сторил кривичното дело, дека во неговите дејствија нема инкриминирачки елементи и во поглед на законска дозволеност на неговите дејствија, но и во поглед на евентуална штета, рече Андреевски, додавајќи дека на Зеќири не може да му се суди за неговата стручност или нестручност, туку за повреда на закон. 

Според одбраната, станува збор за специфична материја, а Зеќири се обидувал да го заштити државниот буџет. 

-Не е сторена штета од причини што моделите за кои се склучувани договори се со цел да не се сторува штета на буџетот во иднина од делувањето на загубарите т.е. Пошта и Железници, за кои јавна тајна е дека имаат милионски загуби секоја година во континуитет, а за кое никој не сносил одговорност, рече Андреевски. 

Обвинителката за гонење на организиран криминал и корупција, Катерина Коларевиќ образложувајќи го обвинителниот акт рече дека Зеќири делото го сторил свесно и не повел соодветна постапка за јавни набавки како што е предвидено со законот. 

-Владата не му дала одврзани раце да склучува договори во четири очи, рече Коларевиќ. 

Според неа, не се испочитувани одновните принципи на Законот за јавни набавки, а тоа е постоење конкуренција помеѓу економските оператори и нивен еднаков третман. 

Инаку, рочиштето доцнеше безмалку половина час поради дојавите за бомби во скопските улулишта. 

Обвинителката за гонење организиран криминал и корупција, Катерина Коларевиќ доцнеше на судењето поради тоа што училиштето во кое учи нејзиното дете добило дојава за бомба. 

Зеќири е обвинет за злоупотреба во Генералниот секретаријат во Владата. Обвинителството за борба против организиран криминал и корупција го сомничи дека незаконски присвоиле 145.400 евра. 

Во периодот од април 2021 до јануари 2022, како генерален секретар на Владата, без спроведување на соодветна постапка за јавна набавка, склучил договор за консултантски услуги со правно лице, во што со умисла му помогнале осомничените хрватски државјани.

Даниел Василев