Заев се сретна со европратениците Тања Фајон и Кнут Флекенштајн

Претседателот на СДСМ Зоран Заев денеска во седиштето на партијата се сретна со европратеничката од Социјал-демократите и заменик претседателка на групата на Прогресивна алијанса на социјалисти и демократи во Европскиот парламент, Тања Фајон и со европратеникот Кнут Флекенштајн.

На прес-конференцијата по средбата Заев информира дека разговарале за претстојните избори, потенцирајќи дека граѓаните на Македонија треба да имаат квалитетен живот како и сите граѓани во Европа, бидејќи тоа го заслужуваат.

- Тоа ќе го обезбедиме заедно со граѓаните на фер, регуларни и демократски избори, кои што мора да се случат и мора да има промени. Ова е моментот заедно да создадеме сегашност и иднина за нас, нашите деца и за државата, рече Заев.

Од големо значење е Македонија, како што посочи, да добие демократски и легитимно избрана влада, со цел да се обноват демократските институции, економијата, здравството, образованието, демократијата и правдата.

Европратеничката Тања Фајон рече дека целосно поддржува подобар живот во Македонија, но и дека на земјата и е неопходна промена бидејќи економијата и здравството се во лоша состојба, а многу млади луѓе ја напуштаат државата.

- Се надевам дека ќе има фер, слободни и демократски избори. Луѓето мора да имаат слобода на избор и одлучуваат за иднината на државата. Меѓународната заедница, вклучително и ние од Европскиот парламент, одблиску следиме што се случува сега во предизборниот период и за време на изборите. Сметам дека е многу важно за Македонија да спроведе такви избори и кои ќе бидат признаени, рече Фајон.

Посочи дека имала средба со Специјалната јавна обвинителка и дека дава целосна поддршка за нејзината работа.

На новинарско прашање за изборните листи на СДСМ и дали на нив ќе има граѓански активисти, Заев рече дека е во разговори со коалициските партнери и дека на повидок е нешто различно и поинакво во Македонија. Најави дека коалиционите листи на опозицијата од левица и центар ќе биде проткаена во сите изборни единици со независни кандидати.