Забрането движење по мостот меѓу Долни Балван и Таринци, но месносто население не ја почитува сообраќајната сигнализација

Мостот на реката Брегалница, кој ги поврзува карбинските села Долни Балван и Таринци се уште е затворен за сообраќај, но очигледно е дека месното население не ја почитува забраната и покрај тоа што е ставен насип со земја и има сигнализација да не се поминува по него.

Овој мост попушти по налетот на водата и дрвјата кон средината на  декември минатата година, кога се зголеми нивото на реката Брегалница. Поради зголемиот водостој на реката во овој период се уште не е направен увид за да се види колкава е штетата и што на него треба да се санира. Градоначалникот на Карбинци, Виктор Паунов, вели дека побарале и дозвола од Министерството за животна средина да се пренаосочи коритото.

-Приоритет ми е прво мостот да се оспособи за движење. Потоа ќе се разгледува и прашањето за одговорноста. Ние побаравме дозвола од Министерството за животна средина да се пренасочи коритото за да може да се направи комплетен увид и да се утврди стабилноста на тлото. Во меѓувреме разговараме и за изработка на целосен проект за санација. Потоа ќе се бараат пари за негова реализација, рече Паунов.

Претставници од  Министерството за животна средина биле и во контрола  за да се види дали чистењето на речното корито е направено според проектот.

Регионалниот пат меѓу селата Долни Балван и Таринци со години чека на реконструкција, проектот е готов, а со него е предвидена и изградба и на велосипедска патека. Проектот во моментов е на ревизија во Министерството за транспорт и врски, а овој пат е дивоградба и досега не можеше да се впише во Катастар, ниту на него да се работи на проширување.