Во Велес завршија 9. етно работилници

 Во Куќата на Касапови или попозната како Куќата што лебди во стариот дел на Велес денеска со доделување дипломи на учесниците завршија со работа деветтите етно работилници.

Етно работилниците за грнчарство, столарство, ткаење, изработка на накит и копаничарство изминатите десетина дена се одржуваа во спомен-куќите на Кочо Рацин, на Васил Главинов, на Јордан Хаџи Константинов-Џинот и на Касапови, а ги раководеа мајстори на својот занает.

Организатор и годинава беше Здружението на граѓани „Разбој“ со подршка на општина Велес и Советот на млади. 

Градоначалникот Чадиев потенцира дека општината давала и ќе дава поддршка за негување на старите занаети и за воведување на младите во основата на старите занаети се со цел тие да оживеат и да не изумрат.

Гоце Станчев изјави дека годинава имало околу 60 ученици и додаде оти секоја година интересот за етно работилниците е се поголем.

- Важно е да се зачува традицијата на старите велешки занаети, а преку овие етно работилници ќе имаме повторно и идни грнчари, столари и други занаетчии, потенцира Станчев.