Во израелски напади во Појасот Газа загинале 38 лица

Триесет и осум лица загинаа во израелски напади во различни подрачја во Појасот Газа, објави денеска палестинска новинска агенција.

Меѓу жртвите имало 13 Палестинци кои ја придружувале испораката на помош во јужниот дел на крајбрежниот појас, според агенцијата.

Други, наводно, биле убиени во напади врз централна и северна Газа, вклучувајќи жени и деца.

Израелската војска соопшти дека „извршила прецизни напади врз вооружени терористи на Хамас собрани на две различни точки за состаноци во јужниот дел на Газа“, откако добила разузнавачки информации за нивното присуство.

„Терористите оперираа на хуманитарниот коридор во јужниот дел на Појасот Газа“, додаде војската. Целта на нападот била „да се обезбеди безбедно доставување хуманитарна помош за цивилите“.

Милитантите на Хамас планирале „насилно да киднапираат камиони со хуманитарна помош“, напишаа израелските одбранбени сили.