Утре ќе се бие битката за Битола

Пелистер утре го игра големото градско ракометно дерби со Еурофарм Работник. Мечот беше презакажан за утре со почеток од 18:30 часот, а тренерот на „зелено-белите“, Томе Петрески, во пресрет на истиот посака победнички старт на новата сезона.

„Амбициите ни се јасни и сакаме излез во Европа. Не беше едноставно да се состави целосно нова екипа, поради многубројните заминувањa. Се консолидираме, добро се подготвивме, одиграме доста тест натпревари, а посебно многу добивме од силните тестови на турнирот во Битола. Мислам дека сме поквалитетни од минатата сезона и со нетрпение го чекаме дебито со Еурофарм Работник. Желбата на сите ни е победа во градското дерби. Имаме двајца повредени десни бекови и не знам колку можеме да сметаме на нив. Сепак, тренираме и без левак и спремни сме за предизвикот. Со нашите навивачи како осми играч, ништо не е невозможно“, вели тренерот на битолскиот прволигаш.