Швајцарија ги намали прогнозите за економски раст, очекува инфлација од три отсто

Швајцарската влада денеска значително ги намали прогнозите за раст за оваа и следната година, укажувајќи на зголемениот ризик од „напната енергетска ситуација и нагло зголемување на цените“.

Владата во Берн сега очекува економијата да порасне за два отсто оваа година, наместо 2,6 отсто што ги предвидуваа во јуни.

За 2023 година предвидуваат раст од 1,1 отсто, намалувајќи ја јунската прогноза за 0,6 процентни поени. Бројките не го вклучуваат влијанието на спортските настани, се посочува во соопштението од Министерството за економија (СЕКО).

„По позитивната прва половина од 2022 година, изгледите за швајцарската економија сега се влошуваат“, заклучуваат тие.

„Напнатата енергетска ситуација и наглото зголемување на цените ги оптоваруваат економските изгледи, особено во Европа“, објаснува СЕКО.

Истовремено ја зголемија и прогнозата за инфлацијата која годинава треба да достигне три проценти, а следната година да се спушти на 2,3 проценти. Во јуни прогнозираат инфлација од 2,5 отсто годинава и 1,4 отсто следната година.

Швајцарската економија е помалку зависна од рускиот гас, има значително пониска инфлација од еврозоната и е меѓу најробусните во Европа.