Се зголемува трагичниот биланс од земјотресот во Албанија, меѓу жртвите и деца, над 300 повредени

Се зголемува бројот на жртвите од силните земјотреси што ја погодија Албанија во утринските часови.

Според последните потврдени информации од Министерството за одбрана, животот го загубиле шест лица, од нив тројца во населбата „18“ во Драч, две во Туман и едно лице во Курбин.

Се уште не е позната судбината на четворица косовски граѓани кои биле сместени во мал хотел во Драч кој е целосно урнат. Не се исклучува можноста во хотелот да настрадал и некој од персоналот.

Спасувачки екипи се максимално ангажирани во отстранување на урнатините од петкатница во Драч и повеќекатница во Туман. Според очевидци, под урнатините во зградата во Туман има девет лица – членови на две семејства.

Работата ја отежнуваат честите потреси, кои од неколку минути пред четири часот ја надминуваат бројката од 110 потреси.

Инаку, по силниот земјотрес во 3:56 со јачина од 6,4 степени според Рихтер, речиси со идентична јачина, 6,3 степени регистриран е потрес во 7:20 часот.