Русија гради слетна писта во близина на воен аеродром во Сирија

Русија гради писта за слетување на авиони во близина на воен аеродром  во Сирија, пренесоа француските медиуми, повикувајќи се на најпознатата сириска организација за мониторирање на конфликтот.

Според Сирискиот Центар за мониторинг на човековите права, со седиште во Лондин, а кој располага со широка мрежа различни извори низ земјата, „руските сили градат долга писта, што може да прифати големи авиони, во близина на воениот аеродром Хемејмим“ во крајбрежната провинција Латакија“, која важи за  бастион на режимот на претседателот Башар ал-Асад.

„Русите не им дозволуваат на Сиријците, цивили или војници, да влезат во оваа зона“, посочува организацијата.

Центарот тврди дека во последните недели воени авиони слетувале на овој аеродром „со воена опрема и стотици руски воени советници и техничари“.

- Русите, освен тоа, се на пат да го прошират аеродромот во Хамидие, што вообичаено се користи за прскање на земјоделските површини со пестициди, рече директорот на организацијата Рами Абдел Рахман.

Овој објект се наоѓа во Тартус, втората крајбрежна сириска провинција, која, исто така, е бастион на режимот на Асад.

Центарот овие информации ги лиферува откако почна полемиката за евентуалното засилување на военото присуство на Русија во Сирија. Москва, главниот сојузник на режимот во Дамаск, владините сили на Асад ги снабдува со оружје, откако тие во последно време загубија територии од џихадистите.