РСБСП: Со еко-возење до поголема заштеда и помала емисија на штетни гасови

Стартување на моторот и веднаш придвижување, правилно менување на брзините, возење со константна брзина и држење растојание помеѓу возилата, правилен товар... се дел од препораките на Републичкиот совет за безбедност на сообраќајот на патиштата (РСБСП) до возачите за еко-возење за почиста средина и побезбеден сообраќај со што, според нив, потрошувачката на гориво може да биде намалена и до 30 проценти.

- Многумина од возачите не знаат, многумина не се доволно информирани, многумина не веруваат, но истражувањата и фактите покажуваат дека со промена на навиките на однесување во сообраќајот и со промена на техниките на управување на моторно возило може да се заштеди гориво, да се заштедат средства, да се заштити животната средина и да се направи патниот сообраќај да биде побезбеден, истакнуваат од РСБСП.

Според нив, за еколошко и еконоимично возење меѓу другото потребно е оптимално да се товари возило, да се провери притисокот на гумите, да се планира патувањето да се избегнува патување во делови од денот или делови од патот каде што има најголем сообраќаен метеж.

- Потрошувачка на енергија. Сите електрични системи во возилото се напојуваат со енергија од моторот. Оттука, колку повеќе ја користите електричната енергија во возилото, толку повеќе трошите гориво. Клима уредот црпи енергија од моторот. При високи температури, потрошувачката може да се зголеми за 25 отсто. Затоа, прилагодете го клима уредот со разлика од надворешната температура од 4 до 5 степени, посочуваат од РСБСП.

Секој возач, велат тие, секогаш треба да биде свесен за еколошката димензија кога го управува возилото, односно да практикува начини на возење кои за последица имаат намалена емисија на штетни гасови во атмосферата.