Рот: Сакаме Македонија да биде успешна приказна и во 2018 година

Сакаме Македонија да биде успешна приказна и во 2018 година. Германија ја поддржува Македонија во исполнувањето на европските приоритети и заложби за интегрирање во ЕУ и НАТО, истакнал  Михаел Рот, државен министер надлежен за Европа во германското Министерство за надворешни работи на денешната средба во Берлин со македонскиот министер за надворешни работи Никола Димитров.

Тој, како што соопшти МНР, изразил задоволство од досегашниот напредок на реформскиот процес и политиките на Владата во функција на заживувањето на македонските евроинтеграции и ја поздравил досегашната соработка со институциите на ЕУ во рамки на евроинтегративен процес на земјата.

На средбата, одржава во рамки на работната посета на Димитров на Германија, било изразено задоволство од добрите билатерални односи и новата динамика во политичкиот дијалог меѓу двете земји.

Министерот Димитров информирал за тековните активности и предвидената динамика за имплементација на реформите во насока на исполнување на неопходните критериуми за почеток на преговорите за членство на земјата во Европската Унија и влез во НАТО.

За време на работниот престој во Германија, министерот Димитров учествувал и на работилницата “Dialogue Series: Imagining New Paths for a Prosperious Macedonia; Euro-Atlantic Integration of Macedonia”, што се одржа во организација на Финдацијата Бергхоф, во Потсдам.