Продолжуваат протестите во Турција поради приведувањето на градоначалникот на Истанбул

Антивладин протест организиран од најголемата турска опозициска Републиканска народна партија (ЦХП) за поддршка на уапсениот градоначалник на Истанбул, Екрем Имамоглу, беше одржан денеска во Јозгат, град во централна Турција кој се смета за традиционално упориште на Партијата на правдата и развојот (АКП) на претседателот Реџеп Таип Ердоган.

– Јозгат, кој вообичаено ја поддржува АКП на претседателот Реџеп Тајип Ердоган, го скрши стереотипот, порача на митингот лидерот на ЦХП, Озгур Озел.

Како дел од протестот, стотина земјоделци со трактори денеска блокираа патишта во централана Турција. Во март, десетина локални фармери беа казнети поради организирање демонстрации на трактори, по апсењето на Екрем Имамоглу.

На митингот во Јозгат беше прочитано писмо од Имамоглу во кое тој повикува на предвремени избори.

Денеска се навршува еден месец од притворањето на Имамоглу. На 23 март, судот нареди Имамоглу да биде ставен во притвор под обвиненија за корупција, што тој ги негира. Апсењето на Имамоглу предизвика масовни протести во поголемите градови во Турција, кои доведоа до судири со полицијата, а стотина луѓе беа приведени.

Имамоглу беше официјално номиниран за претседателски кандидат на ЦХП откако беше приведен. Претседателските избори треба да се одржат во 2028 година, но може да се одржат и порано. За опозицијата затворањето на Имамоглу е политички мотивирано, иако владата инсистира на тоа дека судството во Турција е независно и ослободено од политичко влијание.

Митингот во градот Јозгат е втор од серијата што лидерот на ЦХП, Озел, најави дека ќе ги одржува секој викенд во различни области во Турција, повикувајќи на ослободување на Имамоглу под слоганот „Народот се залага за својата волја“. Првиот протест се одржа минатата недела во црноморскиот град Самсун. Исто така, протести се одржуваат секоја среда во различна област на Истанбул.