Предавање за практиката на кураторскиот колектив What, How & for Whom/WHW

Музејот на современа уметност заедно со Проектниот простор „Прес ту егзит“ вечер од 20 часот во МСУ организираат предавање на Сабина Саболовиќ, на кој таа ќе ја претстави практиката на кураторски колектив од кој и самата е дел - What, How & for Whom/WHW - кој се занимава со континуирана реконфигурација на односите на уметничката и културна продукција со поимите на историјата и политиката. 

Презентацијата ќе се фокусира на нивниот најнов проект насловен „Моето слатко мало јагне (сè што гледаме може да биде и поинаку)", ко-куриран со Катрин Ромберг. Насловен по делото на хрватскиот уметник Младен Стилиновиќ (1947-2016), проектот е инспириран од неговиот постојан антисистематски уметнички пристап во потрага по автономни начини на уметничкото создавање.

- Базиран врз Колекцијата Kontakt Art од Виена, која вклучува антологиски дела на уметници од Централна, Источна и Југоисточна Европа од 1960 година до денес, проектот ги спротивставува канонските дела од колекцијата со намера да адресира и одново да формулира некои од постојано актуелните теми присутни низ делата во колекцијата, како што се радикалниот утопизам, фигурата на уметник дисидент, прашањата за родот, политичките субјективитети и ангажираното делување, и статусот на јавниот простор, соопшти МСУ. 

Кураторскиот колектив What, How & for Whom/WHW е формиран во 1999 година со седиште во Загреб и Берлин. Организира продукциски, изложбени и издавачки проекти, и е вклучен во долгорочни колаборативни платформи и културни политики.