Таунзенд: Во Ирак и Сирија се уште има меѓу 12.000 и 15.000 борци на ИД

Терористичката група Исламска држава се уште брои меѓу 12.000 и 15.000 борци во Ирак и Сирија, изјави американскиот генерал Стивен Таунзенд, кој командува со воените сили на колацијата во борбата против ИД во Багдад. 

- Процена на разузнавачките служби е дека нивниот број е меѓу 12.000 и 15.000 борци во Ирак и Сирија, истакна Таунзенд преку видео-врска од Ирак. 

Во 2015 и 2016 година Пентагон сметаше дека борците на ИД се меѓу 20.000 и 30.000. 

- Командниот состав на џихадистите претрпе тешки удари, нагласи американскиот генерал. 

- Речиси целото опкружување на лидерот на ИД Абу Бакр ал Багдади „е убиено во последните шест до девет месеци“, со прецизни удари, објасни Таунзенд. 

- И покрај тоа џихадистите остануваат опасни противници. Не очекуваме ненадеен пад на борбениот дух на ИД во Мосул, големиот северен ирачки град, каде има уште околу 2.000 џихадисти, нагласи генералот. 

Тој потенцираше дека дел од нив ќе избегаат со нападите на ирачките сили, но останатите ќе продолжат да ги извршуваат наредбите или да се борат до смрт. 

На 19 февруари ирачката војска започна операција за ослободување на западниот дел на Мосул.