Фестивал на шумите во Малешевијата

Во Малешевијата викендов ќе се одржува вториот Фестивал на шумите. На Беровското Езеро Фестивалот официјално ќе го отвори заменик-министерот за земјоделство, шумарство и водостопанство Ванчо Костадиновски.

 

Како што информира Општина Берово, целта на манифестацијата е да го стави руралниот развој во фокусот и да ја акцентира вредноста на шумите.

 

Фестивалот има едукативен, натпреварувачки, промотивен, саемски, рекреативен и забавен дел. Посетителите ќе можат да присуствуваат на промоции на книги, видеа, филмови, изложби, форуми од еколошки карактер, натпревари во шумски вештини, планински и велосипедски тури, а има и промоција на локални производи.

 

Организаторите очекуваат 200 учесници од целиот регион.

 

Шумите покриваат околу 40 отсто од целокупната територија на Македонија и се важен природен ресурс за околу 60.000 сопственици на приватна шума, особено во ридско-планинските подрачја.

 

Фестивалот е поддржан од CNVP-Македонија, а го организираат општините Берово и Пехчево, Националното здружение на сопственици на приватни шуми и Програмата за зачувување на природата во Македонија.