Преглед на вести од светот

Две лица загинаа во град во северен Израел кој беше погоден од ракетен оган од Хезболах во Либан соопштија израелските власти. Војската соопшти дека околу 20 проектили биле лансирани од Либан во баражот.

Утрово повторно во делови од јужното предградие на Бејрут имаше чад од ракетните напади на Израел. Во израелското бомбардирање на Либан загинаа повеќе од 2.100 луѓе, повеќето од нив во последните неколку недели, а 1,2 милиони беа принудени да ги напуштат своите домови.

Израел вели дека нема друг избор освен да го нападне Хезболах за да можат десетици илјади Израелци да се вратат во домовите од кои избегале од ракетниот оган на Хезболах.

Израелските одбранбени сили (ИДФ) во средата соопштија дека продолжуваат со копнените воени операции во јужен Либан.

Американскиот претседател Џо Бајден синоќа разговарал по телефон со израелскиот премиер Бенјамин Нетанјаху, нивни прв разговор во седум недели. Двајцата лидери се очекуваше да дискутираат за можниот израелски напад на Иран по иранскиот ракетен напад минатата недела.

Поранешниот американски претседател Доналд Трамп на митингот во Пенсилванија,  изјави дека нема да води уште една предизборна дебата со американската потпретседателка и кандидатка на демократите Камала Харис.

Тој ја даде изјавата вчера, неколку часа откако Фокс њуз ги покани двајцата кандидати на претседателските избори на евентуалната втора дебата на 24 или 27 октомври.

Во пораката на социјална мрежа Трамп изјави дека „сега е многу доцна за дебата“ и оти „нема за што да се разговара“

Најмалку две лица загинаа во округот Сент Луси на брегот на Атлантикот на Флорида. Проценката е дека повеќе од 100 домови во округот се уништени од ураганот „Милтон“, објави Ен-Би-Си Њуз. Претседателот Џозеф Бајден го повика населението на Флорида да се евакуира. На Флорида повеќе од два милиони луѓе останаа без струја поради ураганот, од кои 400.000 се во Тампа. Локалните власти и членовите на Националната гарда на Флорида им помагаат на погодените од ураганот.   Беа издадени вкупно 130 предупредувања за торнадо од синоќа.

Речиси 100,000 луѓе беа сместени во центрите за евакуација низ Флорида синоќа, изјави извршниот директор на Одделот за управување со вонредни состојби на Флорида, Кевин Гатри.

Ураганот го зафати и стадионот на бејзбол-тимот Тампа Беј Рејс.

Ураганот Милтон ја зафати западна Куба оставајќи ги поплавените улици и домови пред да се упати кон Флорида.

Жителите на Куба ја проценуваат штетата на нивните имоти.

Ураганот Милтон ескалира од тропска бура во ураган од петта категорија, најмоќната категорија, за помалку од 24 часа, поттикнат од топлите води во Мексиканскиот залив. Подоцна беше намален на ураган од четврта категорија со максимални постојани ветрови (241 km/h), според советите на Националниот центар за урагани. Се очекува ураганот да остане исклучително опасен по падот на Флорида а предвидувањата за катастрофални штети и прекини на струја се очекува да траат со денови.