Бегајќи од полиција комбе со мигранти пропадна во канал во Велес | ВИДЕО

Комбе полно со мигранти вчеравечер околу 20 часот пропадна во ископаниот канал на главната велешка улица. Комбето бегало од полиција и тргнало во спротивен правец на улицата „8 Септември“, од кружниот тек кон С`рмаале, но најверојатно, возачот не знаел дека улицата се реконструира, па паднал во шанецот.

Од велешката полиција потврдија дека бегајќи од полициска потера, комбето влегло во забранет правец на улицата „8 Септември“ и пропаднало во ископаниот ров. Оттаму велат дека возачот и совозачот се фатени и приведени.

Според дел од медиумите, македонската полиција заедно со припадници на ЕУЛЕКС, го следеле комбето уште од македонско-грчката граница.

Неофицијално во сообраќајната несреќа повредени се 11-годишно дете и неговиот татко, кои биле во комбето.

Повеќе детали од полицијата за инцидентот се очекуваат денеска.