Ѓерлек: Државјаните на БИХ можат да се вакцинираат во Србија без пријава

Државнот секретар во српското Министерство за здравство Мирсад Ѓерлек денеска изјави дека на граѓаните на Босна и Херцеговина не е им е потребно повеќе да се пријавуваат за вакцинација против коронавирус во Србија преку е-управа, и да тие можат директно да дојдат до било кој вакцинален пункт во Србија, јави дописникот на МИА од Белград.

-Тие можат да дојдат на било кој пункт за вакцинација во Србија и да примат која било од вакцините што се достапни, изјави Ѓерлек за ТВ Пинк.

Тој оцени дека бројот на новозаболени во Србија опаѓа, но дека е загрижен за нееднаквиот одговор на вакцинацијата.

-Миграцијата, движењето на луѓето може да доведе до непредвидливи работи и вирусот од регионот може да се пренесе во друг, посочи тој.

Синоќа српската Влада во знак на солидарност и постигнување на колективен имунитет во регионот донесе одлука да им се овозможи на граѓаните на БИХ имунизација во Србија против Ковид-19.

Претседателот на Србија, Александар Вучиќ, како што јавија медиумите синоќа побара од владата да овозможи бесплатна вакцинација и за сите граѓани на Северна Македонија по сопствен избор.

Тие во Србија ќе можат да добијат една од четирите вакцини од производителите „Фајзер-Бајонтек“, „Синофарм“, „АстраЗенека“ и „Спутник Ве“.