Компанијата „Facebook“ на суд поради монопол, ќе треба да се откаже од „Instagram“ и „WhatsApp“

Главниот дел од тужбата се однесува на купување на „Instagram“ за една милијарда долари во 2012 година и „WhatsApp“ за 19 милијарди во 2014 година. 

Од Федералната комисија за трговија соопштија дека ќе побараат одлука со која, меѓу другото, ќе се бара од „Facebook“ да се откаже од своите аквизиции, вклучувајќи ги и гореспоменатите „Instagram“ и „Whatsapp“.

„Речиси цела деценија, „Facebook“ ја користи својата доминација и монопол на пазарот за да уништи послаби ривали и да ја задуши конкуренцијата, сето тоа на штета на редовните корисници“, изјави државната обвинителка на Њујорк, Летиција Џејмс.

Таа истакнала дека компанијата користи огромни суми пари за да ги преземе ривалите пред тие да ја загрозат доминацијата на „Facebook“.

„Ниту една компанија не треба да има толку многу неконтролирана моќ над нашите приватни информации и нашите социјални интеракции. Поради тоа поднесуваме тужба во корист на милиони корисници и милиони сопственици на помали компании кои се погодени од однесувањето на ‘Facebook’“, вели Џејмс.

„Facebook“ е втора голема технолошка компанија која се соочува со ваков правен предизвик откако американското Министерство за правда на САД, во октомври го тужеше „Google“ од слични причини.

По објавувањето на ваквата вест, акциите на „Facebook“ веќе паднаа за 3 проценти.