Иницијативата против депонија во Неготино ги собра првично потребните сто потписи

Иницијативата против депонија за индустриски отпад во Неготино ги собра првично потребните сто потписи. Стартот на собирањето потписи утринава го започна Сашко Тодоров, претседател на Здружението на граѓани „Ековита”, во канцеларијата на Државна изборна комисија, подрачно одделение Велес, канцеларија Неготино.

– Законски, имавме рок до 18 овој месец да собереме 100 потписи за оваа иницијатива. Но, ние веднаш ги собравме потребните потписи, па и повеќе од тоа, рече Тодоров за МИА.

Со собрани сто потписи, по оваа иницијатива, околу тоа дали има надлежност, треба да се изјасни Советот на општината.

– Доколку Советот се изјасни дека иницијативата е уредна, потоа треба да се соберат околу 3.200 потписи, најмалку 20 проценти од лицата со право на глас во избирачкиот список за општина Неготино, како иницијатива за распишување на референдум по ова прашање. Со собрани потписи, понатаму Советот одлучува за распишување референдум, појаснија од ДИК.

Како билошки инжењер по професија, Тодор повтори дека луѓето стравуваат дека депонијата негативно ќе влијае врз здравјето и околината, како и врз единственото заштитено подрачје Орлово Брдо во општината.

Слично како него, се изјаснија и други неготинци, кои деновиве присуствуваа на јавната расправа за студијата за оцена на влијанијата врз животната средина. Тогаш, ним им беше кажано дека целиот процес со депонијата за индустриски инертен и неопасен отпад ќе биде безбеден по здравјето на луѓето и околината, контролиран и транспарентен, а предвидено е и рекултивирање на самата депонија.