Средношколци од туристичко-угостителскиот центар од Охрид со сертификати од обука во Шпанија

 Деветнаесет ученици од Општинското угостителско-туристичко училиште „Ванчо Питошески“ од Охрид се вратија од Шпанија со стекнати меѓународно признати сертификати, документи што ќе им помогнат во нивниот натамошен професионален ангажман.

Стнува збор за реализирана обука во рамки на „Еразмус плус“ програмата на Националната агенција за европски образовни програми и мобилност, преку која учениците и тројца нивни професори беа на триседмична професионална обука во реномиран хотел до Барселона.

Тие зависно изборот на образовната програма беа работно ангажирани на разни позиции во хотелот како рецепционери, готвачи и келнери. Нивните работни ангажмани беа поврзани со прием, сместување, испраќање гости и други услуги на рецепција, подготвување разни видови храна и пијалоци, работа на шанк, послужување храна и пијалоци, подготвување сали за конференции, семинари…

Сето тоа во насока на демонстрација на стекнатите знаења, нивна професионална надградба, искуства во тимско работење, стенување и креирање нови идеи, инспиративно искуство.

Покрај стекнувањето нови практични знаења и вештини, учениците имаа можност да се дружат, да запознаат нови предели и култури, но и да претстават дел од убавините на Македонија, Охрид и секако нешто од македонската традиционална кујна.