Починатиот пар од Битола тргнал на свадба

„Тргна на свадба, а ја најдоа мртва во мотел“- потресно сведоштво на мајката на младата битолчанка

 

 

„Бабо, зошто плачеш“? Вака прашуваше две и пол годишната Kлаудија својата баба Гулсаде Османовска, која ја оплакуваше смртта на својата 27-годишна ќерка Ѓулџан, која заедно со сопругот Kашмир Исовски беше пронајдена мртва во мотелот „Пржо“ во Битола.

majkabitolaaaa

 

Како што пишува ДНЕВНИК, тие најверојатно 10 дена лежеле мртви на креветот во мотелот каде што починале од предозираност.

 

Имале четири деца, од кои трите поголеми се згрижени во домот „11 Октомври“ во Скопје, а најмалото ќе остане кај своите роднини. Малечкото девојче вчера не можеше да разбере дека во еден ден ги загуби мајката и таткото.

 

Вработени во мотелот пред три дена ги пронашле како лежат голи во фаза на распаѓање во мотелската соба. По извршената обдукција, чии резултати се уште не се јавни, телата на брачните другари беа закопани на гробиштата во Битола. Со солзи во очите и тага беше пречекана екипата на ДНЕВНИК од  семејството Османовски во нивната скромна куќа на битолскиот Баир.

 

-Мајката на починатата девојка беше покриена со темна шамија и можеше да се забележи голема болка на нејзиното лице. Ни ја раскажа потресната приказна за ќерка си, на која, како што вели, дрогата и го одзеде семејството, а сега и животот. Присетувајќи се на тој кобен 24 октомври, мајката рече дека ќерка и заминала на свадба и веќе не се вратила, пренесе весникот.

 

 - Ми рече, мајко, ќе излезам на свадба. И реков, ќерко, немој да одиш на свадба зашто се лекуваше. Не, рече, ќе одам, малку ќе поседам и ќе се вратам. Во 16:30 часот излезе од дома и девојчето повеќе не ми се врати. Вториот ден отидов и пријавив во полиција. Им дадов податоци, таа немаше ни лична карта ни пасош во неа. Секој ден прашував се до завчера кога ми кажаа дека починала, раскажува таа.