Американски носач на авиони во Виетнам после 40 години

Американскиот носач на авиони Ју-Ес Карл Винсон, денеска, за првпат од Виетнамската војна, пристигна во Виетнам, во пристаништето Дананг.

Американскиот носач на авиони, во придружба на крстосувач и разорувач, пристигна со повеќе од 6.000 екипаж во Дананг, што е најголемо воено присуство на САД во Виетнам од војната во 1975 година.

Американските медиуми оценуваат дека со доаѓањето на американскиот носач на авиони, се потенцираат се поголемите стратешки врски меѓу некогаш непријателските земји.

„Оваа посета означува камен-темелник, што е огромно значење за нашите билатерални односи и ја покажува американската поддршка за силен, просперитетен и независен Виетнам“, наведе во соопштение американскиот амбасадор во Виетнам Даниел Крајтенбринк.