Украински ултра десничари фрлаа факели врз Конзулатот на Русија во Одеса

Украински ултра десничари синоќа фрлаа запалени факели преку оградата на комплексот на Генералниот конзулат на Русија во Одеса, а оградата на комплексот ја испрскаа со боја.

- Откако ја пееја украинската национална химна, учесниците во протестот фрлаа запалени факели преку оградата на објектот и оградата ја прскаа со боја, јавија дел од украинските медиуми.

Околу 30 припадници на различни националистички организации се собраа кај Рускиот конзулат, а своите акции ги објаснија со тврдења дека одбележуваат четврта годишница од случувањата поврзани со анексијата на Крим кон Русија.

Според руските медиуми во близина на Конзулатот имало педесетина полицајци, но тие не ги спречиле националистите.

Канцелариите и мисиите на разни руски организации и компании често се цел на напади на многубрајни украински крајни десничари.