Нетанјаху: Знаеме дека 21 заложник е жив, нема потврда за судбината на уште тројца

Тројца израелски заложници за кои досега се веруваше дека се живи можеби починале, со што бројот на оние за кои се верува дека се уште се живи се спушти на 21, изјави израелскиот премиер Бенјамин Нетанјаху, потврдувајќи ги изјавите на американскиот претседател Доналд Трамп.

Зборувајќи на настан во Белата куќа во вторникот, Трамп рече дека пред една недела имало 24 живи заложници, но дека тој број се намалил на 21. Тој не цитираше извор, ниту даде дополнителни детали.

Координаторот на Израел за прашања поврзани со заложниците, Гал Хирш, на платформата X објави дека палестинската милитантна група Хамас држи 59 заложници, од кои 24 се живи, а 35 се мртви.

Коментарите на Нетанјаху се чини дека ја потврдуваат бројката што ја наведе Трамп.

-Со сигурност знаеме дека 21 се живи, тоа не е спорно. Има уште тројца за кои, за жал, не можеме да потврдиме дека се живи, рече Нетанјаху во снимен говор објавен на социјалните мрежи.

„Штабот повторно го повикува премиерот да ја запре војната до враќањето на последниот киднапиран. Ова е најитната и најважна национална задача“, изјави портпаролот на групата што ги претставува семејствата на заложниците.

Судбината на заложниците длабоко влијае на повеќето Израелци и предизвикува растечки немири и поделби во израелското општество додека војната продолжува.

Според израелските податоци, за време на нападот на Хамас врз јужниот дел на Израел на 7 октомври 2023 година, вкупно 251 лице биле киднапирани, а околу 1.200 луѓе, претежно цивили, биле убиени.

Повеќето од заложниците кои досега се вратија живи во Израел беа ослободени како дел од договорот со Хамас за време на двате привремени прекини на огнот кон крајот на 2023 година и почетокот на 2025 година.

Израел одговори на нападот на Хамас со воздушен и копнен напад врз Газа, во кој загинаа повеќе од 52.000 Палестинци и беше срамнет со земја поголемиот дел од енклавата, наведуваат здравствените власти предводени од Хамас.

Израелската влада наведува дека двете главни цели на војната се уништување на Хамас и ослободување на заложниците.

Оваа недела Израел најави проширување на офанзивата во Газа, што предизвика страв кај семејствата на заложниците дека тоа би можело дополнително да ги загрози нивните најблиски.