Македонија
6. February 2023 - 16:30

Не се знае кога и како ќе се купат лекови за болните од цистична фиброза

Беким Сали не кажува од каде ќе се обезбедат пари за итна набавка на лекот за 8 пациенти со цистична фиброза, ниту кога конкретно болните кои се во критична состојба ќе добијат Трикафта. Министерот без конкретен одговор дали од здравството ќе се кратат пари за да се набави неопходната терапија. 

-Министерството за здравство не е најповикано за да обезбеди средства во врска со оваа терапија. Според правилникот за обезбедување терапија за пациенти со ретки болести, што ни е посебна програма во Министерството за здравство, ние можеме да обезбедиме средства за дијагноза којашто брои до 18 или 20 пациенти. Тоа е еден на сто илјади жители. Поради тоа што цистична фиброза не е ретка болест кај нас, според овие критериуми, таа терапија ќе треба да се обезбеди преку Фондот за здравствено осигурување, односно Клиниката за педијатрија во овој случај, изјави Беким Сали, министер за здравство.

Ден пред протестот на пациентите со Цистична фиброза и министерот за финансии рече дека ќе најде решение, но без детали од каде и кога ќе се обезбедат околу 2.5 милиони евра колку што чини годишната терапија само за 8 –те пациенти кои се во влошена состојба.

Беким Сали денеска не одговори ниту кога ќе се направат најавените измени во законите за лекови, јавни набавки и здравствено осигурување, за да може државата директно да купува скапа терапија од производителите како што е случајот и со Трикафтата, лек кој го бараат 60-тина пациенти со Цистична фиброза за да имаат нормален живот. Тој само информираше дека стапиле во контакт со компанијата, но се уште не потпишале договор.