Научен симпозиум „Денови на Јустиниан I“

Mеѓународниот научен симпозиум „Денови на Јустиниан I“ на тема „Византија и наследството на Европа: Поврзување на културите“, денеска ќе биде отворен во Скопје.

На отварањето ќе биде промовиран и Зборникот на трудови од минатогодишниот симпозиум „Денови на Јустинијан I“ од доц. д-р Александар Спасеновски.

Во текот на двата работни дена свои реферати ќе имаат повеќе од 40 еминентни професори и научници од Албанија, Белгија, Бугарија, Грција, Италија, Крим, Обединето Кралство, Полска, Романија, Србија, Франција, Холандија, Хрватска, Чешка и Македонија.

На симпозиумот ќе бидат презентирани најновите сознанија од областа на византолошките и средновековните студии, што го вклучува и феноменот на културното и историското наследство, сфатен како интегративна компонента на европската цивилизација.

Сеопфатниот тематско-содржински концепт на рефератите меѓу другото ќе ја претстави Република Македонија како интегрален дел од византиските културни и духовни традиции и наследство.

Симпозиумот „Денови на Јустинијан I” претставува дел од партнерската програма помеѓу Универзитетот „Евро-Балкан“ и Универзитетот во Болоња и кампусот во Равена, а се одржува со поддршка од  Министерството за култура на Република Македонија и Град Скопје.