Најмалку 19 загинати во напад врз авганистанските безбедносни сили

Најмалку 13 полицајци и цивили се убиени вчеравечер во заседа на талибанците, изјавија официјални претставници. Осуммина други се ранети, вклучувајќи го и шефот на обласната полиција.

Шефот на полицијата правел свадбена веселба во својот дом, кога бил информиран за нападот на талибанците врз неговите колеги, за ДПА изјави провинцискиот советник Азам Афзали.

Тој веднаш заминал со своите колеги да го спречи нападот, но сите биле заробени, додаде Афзали. Полицаецот младоженец во судирот со талибанците, што траел 2,5 часа, и во кој и самиот бил ранет, загубил двајца од своите браќа.

Германската агениција јавува за уште најмалку шест убиени војници во друг ноќешен напад врз контролен пункт на безбедносните сили во областа Аргхандаб, во јужната провинција Забул, соопштија од Министерството за одбрана.

Во главниот град Кабул, пак, четири лица биле ранети откако нивното возило било погодено од бомба.

Насилството во Авганистан продолжува и покрај договорот меѓу САД и талибанците и плановите за разговори меѓу милитантите и авганистанската Влада.

Талибанците ја презедоа одговорноста за повеќе од 400 напади во минатиот месец, наведе ДПА, цитирајќи воен магазин.