Мали и средни компании се обучуваат за менаџирање со иновациите

Претставници на околу 25 мали и средни претпријатија се обучуваат за менаџирање на иновациите, односно за маркетингот и финансирањето на иновациите.

Обуката се реализира во рамки на проектот „Aim Annovations“ кој е финансиран од Централноевропската иницијатива (ЦЕИ), а го спроведуваат Бренд плус од Австрија и Knowledge центарот од Скопје.

Со неа се очекува да се зголемуват вештините и знаењето на малите и на средните претпријатија во комерцијализацијата на нивните идеи на пазарот со цел да дојдат до успешен бизнис.

Обуката се реализира по направеното истражување за тоа какви се потребите на малите и на средните препријатија и кои се препреките на кои наидуваат при воведувањето на новите технологии.

- Кога се направи студијата, дизајниравме специфичен модул со цел да им се дадат знаења и обуки на претпријатијата во оној дел којшто им е најмногу потребен, така што денешната обука е дизајнирана врз постоечко истражување, изјави Андријана Богдановска-Ѓуровиќ од Knowgledge центарот.

Менаџерите ги оценуваат ваквите обуки како добра можност да ги збогатат своите знаења во оваа област.

- ИТК индустријата се развива со големо темпо и постојано има некои иновации. Ние ги следиме тие иновации како во поглед на новите технологии така и во поглед на новите процеси и затоа присутвото на вакви обуки за нас е многу важно за да го примениме знаењето во нашето понатамшно работење и да развиеме подобри производи во иднина, изјави Елена Јолевска од ИТ компанија која се занимава со креација на софтвер за избори.