Куртумлуш: Во нападот во ноќниот клуб во Истанбул вмешана разузнавачка служба

Нападот во ноќниот клуб во Истанбул за Нова Година беше извршен професионално со учество на разузнавачка служба, изјави денеска турскиот вицепремиер Нуман Куртулмуш.

- Се чини, дека нападот во (клубот) „Реина“ не е дело само на терористичка организација, туку, исто така, во него е замешана и разузнавачка служба. Нападот е извонредно испланиран и организиран акт, изјави Куртулмуш во интервју за телевизијата „А Хабер“.

Одговорност за нападот во Истанбул, во кој загинаа 39 лица, а 70 беа ранети, презеде групата Исламска држава (ИД).

Џихадистичката групка соопшти дека нападот е одмазда за турската воена интервенција во Сирија.