Кривична пријава и притвор за советникот на градоначалникот на Шуто Оризари

Секторот за внатрешни работи Скопје до Основното јавно обвинителство - Скопје поднесе кривична пријава против советникот на градоначалникот на општина Шуто Оризари.

Скопското обвинителство денеска предложи и мерка притвор од 30 дена за барање поткуп за С.М. (40), советник на градоначалникот Курто Дудуш.

Против С.М. од Скопје, поднесена е кривична пријава поради основано сомнение дека сторил кривично дело - „примање награда за противзаконито влијание“, предвидено и казниво по член 359 од КЗ на Република Македонија.

Пријавениот во текот на јануари и февруари годинава, на 25-годишно машко лице од Скопје, му се претставувал дека е вработен во општина Шуто Оризари на влијателна позиција во општинската администрција и дека ќе издејствува легализација на негов објект за сума од 2.500 евра.

Така, по поднесено барање од страна на оштетеното лице до Општината за издавање на Решение за утврдување на правен статус на бесправно изграден објект-куќа, изградена во јуни минатата година, пријавениот, со намера да го искористи своето претпоставено влијание и наводна службена положба, ветил дека ќе издејствува легализација на објектот. С.М. од оштетениот на 19.01.2018 година, побарал за себе парични средства во износ од 2.500 евра, а на 27.02.2018 година примил дел од средствата во износ од 1.000 евра.

Имено, оштетениот на 22 јануари годинава, во просториите на СВР Скопје-Единица за економски и компјутерски криминал, поднел кривична пријава против пријавениот С.М.

На 27.02.2018 година оштетениот дал дополнително известување дека со пријавениот С.М. истиот ден околу 11,00 часот, остварил средба во просториите на општина Шуто Оризари, каде на барање на пријавениот, му дал парични средства во износ од 1.000 евра, претходно фотодокументирани, додека остатокот требало да го исплати по добивање на Решението за легализација, кое му ветил дека ќе биде завршено по два дена.

Од страна СВР Скопје, а врз основа на Наредба за претрес на службени простории и претрес на лице издадена од Основен суд Скопје 1 Скопје, извршен е претрес во општината и врз пријавениот, кој доброволно предал една банкнота од 500 евра, две банкноти од по 200 евра и една банкнота од 100 евра кои се претходно фотодокументирани.