Израел вети одмазда откако во ракетен напад загинаа 12 млади лица на Голанската висорамнина

– Како одговор на ракетниот напад од Либан во кој загинаа млади лица на окупираната од Израел Голанска висорамнина, израелскиот министер за одбрана Јоав Галант вети дека „ќе го погоди силно непријателот“, додека премиерот на таа држава Бенјамин Нетанјаху го прекина своето патување во САД за да се справи со кризата.

Израел вчера вети дека ќе го „погоди силно непријателот“ откако во ракетен оган од Либан загинаа 12 млади луѓе на Голанската висорамнина, анектирана од Израел и ги разгоре стравувањата дека војната во Газа ќе се прошири.

Иран го предупреди Израел дека секоја нова воена „авантура“ во Либан може да доведе до „непредвидени последици“.

Генералниот секретар на ОН, Антонио Гутереш го осуди ракетниот истрел во саботата и ги повика сите страни на „максимална воздржаност“.

Израелската армија го нарече „најсмртоносниот напад врз израелските цивили“ од нападот на 7 октомври што ги започна тековните борби во Газа и предизвика редовна размена на оган преку либанската граница.

Израел го обвини либанското движење Хезболах за истрелување на иранска ракета Фалак-1, но групата поддржана од Иран, која редовно ги гаѓа израелските воени позиции, нагласи дека „нема врска“ со инцидентот.

Ракетниот истрел во Мајдал Шамс, чие население се Друзи кои зборуваат арапски, го поттикна израелскиот премиер Бенјамин Нетанјаху да се врати рано од САД.

По пристигнувањето тој веднаш отиде на состанок на кабинетот за безбедност, соопшти неговата канцеларија. „Хезболах ќе плати висока цена“ за нападот, „цена што досега не ја платил“, рече тој.

По состанокот, неговиот кабинет соопшти: „Членовите на кабинетот ги овластија премиерот и министерот за одбрана да одлучат за начинот и времето на одговорот против терористичката организација Хезболах“.

Не дадоа повеќе детали. Министерот за одбрана Јоав Галант претходно во неделата го посети местото на нападот и вети дека Израел „силно ќе го погоди непријателот“.

Израелското Министерство за надворешни работи соопшти дека Хезболах „ги преминал сите црвени линии“.

Во очекување на одмаздата на Израел, Хезболах евакуираше неколку позиции блиску до границата и во источен Либан, изјави извор близок до групата.

Израелската војска подоцна во неделата соопшти дека погодила цели на Хезболах „длабоко во либанската територија и во јужен Либан“.

Израелско беспилотно летало истрела два проектила врз селото Тараија во источен Либан, уништувајќи хангар и дом без да предизвикаат жртви, изјави либански безбедносен извор.

Хезболах соопшти дека неговиот прекуграничен оган е чин на поддршка за палестинските исламисти од Хамас кои се борат против израелската војска во Газа од 7 октомври, кога го нападнаа јужниот дел на Израел.

 Филип Лазарини, кој ја предводи агенцијата на ОН за палестински бегалци, на страницата на социјалните мрежи Х рече дека само „14 отсто од областите во Газа“ не биле предмет на наредба за евакуација.

Тој го обвини Израел дека создава „хаос и паника“ со честите наредби за евакуација.

Ракетниот напад врз Мајдал Шамс погоди фудбалско игралиште и уби деца за кои локалните власти соопштија дека биле на возраст од 10 до 16 години.

Единаесетгодишно момче претходно било пријавено за исчезнато по нападот, е 12-та жртва.

Ракетниот истрел врз Мајдал Шамс дојде откако израелски напад уби четворица борци на Хезболах во јужен Либан, што ја поттикна милитантната група да изврши одмазднички ракетни напади врз Голан и северен Израел.

 Белата куќа објави дека лансирањето на ракетата било „изведено од либански Хезболах“, додавајќи дека „тоа била нивна ракета и лансирана од област што ја контролираат“.

Специјалниот координатор на ОН за Либан, Жанин Хенис-Плашерт и шефот на привремените сили на ОН во Либан (УНИФИЛ) Аролдо Лазаро во заедничка изјава рекоа дека интензивирањето на размената на оган „може да запали поширок пожар што ќе го зафати целиот регион со катастрофални последивци“.

Либан повика на „итен прекин на непријателствата на сите фронтови“, подоцна повикувајќи на „меѓународна истрага“ за нападот.

Портпаролот на иранското Министерство за надворешни работи, Насер Канани, предупреди дека „секое игнорантно дејство на ционистичкиот режим може да доведе до проширување на опсегот на нестабилност, несигурност и војна во регионот“.

Израелското Министерство за надворешни работи го нарече инцидентот во Мајдал Шамс „масакр“, обвинувајќи го Хезболах за намерно гаѓање цивили.

Многу жители на градот Друзи не ја прифатија израелската националност откако Израел ја зазеде Голанската висорамнина од Сирија во 1967 година.

Сирија ги осуди „лажните обвинувања“ на Израел против Хезболах и рече дека Израел бара „изговор за да ја зголеми својата агресија“.

Во прекуграничните престрелни од октомври досега убиени се најмалку 527 луѓе во Либан, повеќето од загинатите се борци, но билансот вклучува најмалку 104 цивили.

Според израелската армија, досега во северниот дел на Израел се убиени 22 војници и 24 цивили.

Шефот на Хезболах Хасан Насрала изјави дека доколку се постигне прекин на огнот во Газа, неговото движење ќе ги запре прекуграничните напади.

Блинкен рече дека најдобриот начин да се спречи ескалацијата на конфликтот во Газа „е да се постигне прекин на огнот во Газа на кој работиме толку напорно“.

Со месеци не успеваат напорите за договор, но египетските државни медиуми објавија дека разговори треба да се одржат в недела во Рим.