ФСБ: Тероризмот се уште е закана, ќелиите се преселуваат во Европа

Шефот на руската Федерална служба за безбедност (ФСБ) Александар Бортников предупреди дека меѓународни терористички ќелии се преместуваат од Блискиот Исток кон Европа, Централна и Југоисточна Азија.

– И покрај претрпените порази, меѓународните терористички организации претставуваат закана за повеќето земји во светот, истакна Бортников на конференцијата за борба против меѓународниот тероризам во Санкт Петербург.

Бортников истакна дека тероризмот стана многу профитабилен бизнис и дека разновидни финансиски механизми им даваат на терористите дополнителна шанса за опстанок.

Тој предупреди дека Исламската држава и Ал Каеда и понатаму претставуваат сериозна закана и дека во моментов создаваат мрежа на терористички ќелии.

Меѓусебно поврзаните и автономни ќелии се преместуваат од Блискиот Исток во Европа, Централна и Југоисточна Азија, истакна Бортников.

Тој потсети дека минатата година во светот биле извршени 683 терористички напади, во кои биле убиени 4.700 луѓе, а повеќе од 7.000 повредени.

Бортников понуди спроведување низа мерки под покровителство на Обединетите нации, вклучително и консолидација на напорите, организација и размена на податоци и спречување на финансирање на терористички групи.