ЕУ одобри воена акција против шверцерите на луѓе на Средоземното Море

Членките на ЕУ денеска усвоија план за преземање воена акција против трговците на луѓе на Средоземното Море, што подразбира заплена и уништување на бродови со цел да се разбие мрежата на шверцери во Либија, пренесува Танјуг, повикувајќи се на француски медиуми.

ЕУ ја почна првата фаза на собирање разузнавачки податоци во рамки на операцијата NavForMed уште во јули, но сега ќе има дозвола и да ги запира и доколку е потребно да ги уништува бродовите со кои илјадниците мигранти ги ризикуваат животите за да стасаат до Европа. 

- Исполнети се условите за покренување нова воена фаза, изјавил неименуван еврпски дипломат.

Одлуката е донесена во момент кога министрите за внатрешни работи од ЕУ треба да се сретнат во Брисел за да се обидат да договорат квоти за прераспределба на огромниот прилив бегалци кои бегаат од војната.

Голем број членки на ЕУ не беа подготвени да преземат посилна акција против трговците со луѓе, стравувајќи дека ќе се вовлечат во судири во Либија каде од смената на Муамер Гадафи во 2011 година ривалските фракции се борат над контрола на земјата, пренесува Танјуг.

Сепак, лидерите од ЕУ се согласиле дека е потребен многу посилен одговор, вклучувајќи и употреба на сила, после несреќата во април кога крај брегот на Италија се удавија повеќе од 700 мигранти.

Втората фаза на операцијата NavForMed се уште е ограничена на акции во меѓународните води, додека третата фаза ја вклучува воена акција против шверцерите  и во територијалните води на Либија со цел нивните бродови и мрежи да се уништат уште пред да испловат. Тој чекор ќе бара најмалку резолуција од Советот за безбедност на ОН а би било пожелно и одобрување и од либијската Влада.