ЕУ го поздрави Планот на Арапската лига за Газа

Секој план за иднината на Газа мора да обезбеди кредибилни решенија за обнова, управување и безбедност, се наведува во реакцијата на високата претставничка на ЕУ за надворешни работи и безбедносна политика Каја Калас на Планот за закрепнување и обнова на Газа предложен од Лигата на арапски држави.

-Напорите за закрепнување и обнова мора да се засноваат на цврста политичка и безбедносна рамка прифатлива и за Израелците и за Палестинците, која ќе гарантира мир и безбедност за двете страни, се наведува во соопштението.

Калас додава дека Европската Унија го поздравува Планот за закрепнување и реконструкција на Газа претставен минатата недела на Самитот на Арапската лига во Каиро, кој исто така беше поддржан и од Организацијата за исламска соработка, како „сериозна основа за дискусии за иднината на Појасот Газа“ за што ЕУ ќе разговара со своите арапски партнери.

-ЕУ е решена дека Хамас не смее да има идна улога во Газа и дека Хамас повеќе нема да биде закана за Израел. Ќе продолжиме со нашата политичка и финансиска поддршка на Палестинската самоуправа и нејзината програма за реформи, за да и помогнеме да се подготви за враќање да управува со Газа, наведува Калас.

Во реакцијата натаму се посочува дека ЕУ повикува на целосно спроведување на договорот за прекин на огнот и ослободување на заложниците, што ќе доведе до ослободување на сите заложници и траен крај на непријателствата.

-ЕУ е целосно посветена на заживување на политичкиот хоризонт кон мир на Блискиот Исток, заснован на решението за две држави. Унијата потсетува и на важноста од одржлива дистрибуција на хуманитарна помош низ Газа, се додава во реакцијата.