Ердоган: Ирачката жалба пред СБ на ОН за турските војници не е чесен чекор

Турскиот претседател Реџеп Тајип Ердоган синоќа изјави дека поднесената од ирачките власти жалба до Советот за безбедност на ОН за распоредувањето на турски војници во близина на Мосул не е чесен чекор.

- Тие може да се обратат до СБ на ОН. Тоа е нивно право, но не е чесно, изјави Ердоган во интервју за телевизијата Ал Џезира.

Багдад претходно побара од СБ на ОН да изврши притисок врз Турција за повлекување на војниците од камп во близина на контролираниот од „Исламска држава“ ирачки град Мосул.

Ирачкиот претставник во ОН Мохамед Ал Алаким врачи писмо на американската амбасадорка Саманта Пауер во својство на претседател на Советот во месец декември за да го проследи до останатите 14 членови.

Саманта Пауер ја потврди позицијата на САД дека секое распоредување на војска во Ирак треба да биде во согласност со ирачката влада и повика за продолжување на дијалогот меѓу Ирак и Турција.