Џихадисти убија петмина египетски полицајци при напад на Синајскиот Полуостров

Најмалку петмина египетски полицајци се убиени во вооружен напад северно од Ариш -главниот град на немирната египетска провинција Синај, јави ДПА, цитирајќи соопштение на Министерството за внатрешни работи на земјата, поставено на нивната страница на Фејсбук.

Меѓу жртвите има и тројца офицери. Други петмина полицајци се повредени во нападот извршен доцна синоќа.

Полициски единици ја опколија областа на нападот и почнаа потрага по напаѓачите.

За претходните слични напади во Синај одговорност преземаше локалниот огранок на „Исламска држава". Екстремистите нагло ја засилија терористичката дејност таму откако војската го собори од власт претседателот исламист Мохамед Мурси, во текот на летото на 2013 година.