Дастис: Шпанија нема да стави вето за членство на Шкотска во ЕУ

Иницијално Шпанија нема да стави вето на евентуален обид на Шкотска за приклучување кон ЕУ, откако Велика Британија ќе го напушти блокот, изјави шпанскиот министер за надворешни работи Алфонсо Дастис.

Во интервју за шпанскиот весник „Ел Паис“, Дастис истакнува дека со процесот за Брегзит, Шкотска во секој случај ќе ја напушти ЕУ заедно со останатиот дел од Велика Британија.

- За останато ќе видиме потоа. Кој било дел од Обединетото Кралство ако стане држава и сака да се приклучи кон ЕУ ќе мора да поднесе барање и да ги спроведе предвидените чекори за членство, нагласи Дастис.

Шпанија беше еден од најжестоките критичари на референдумот за шкотска независност во 2014 година и тогаш најавуваше дека ако покраината се одвои од Велика Британија, Мадрид ќе се спротивстави на обидите на евентуална независна Шкотска за автоматско членство во ЕУ.