Македонија
23. November 2018 - 10:20

Чистење канали и пропусти на подрачјето на Крива Паланка

На повеќе локации во Крива Паланка извршено е расчистување на објекти за одведување и пропуштање отпадни води за што се ангажирани пет невработени лица, активни баратели на работа од општината.
 
-Општина Крива Паланка со ангажирање на пет невработени лица  во текот на овој месец спроведе чистење на отворени канали, цевчести  пропусти, сливници  и други објекти со акумулиран  земјен материјал и разновиден отпад.Со акцијата досега се расчистени над 30 водопропустни и одводни објекти од кои  се извадени над деведесет метри кубни материјал, информираат од локалната самоуправа на општина Крива Паланка.
 
Активностите се реализираат со цел создавање  услови за нормален проток на атмосферски води  во период на обилни врнежи и дотекување поголема количина вода во населбиите, како дел од превентивните дејства за заштита од поплави во општината.
 
Акцијата  ќе трае до средината на декември 2018 година.