Четворица вработени во ОН загинале при два напади во Мали

Четворица вработени во ОН загинале при синоќешните напади во два објекти во Мали, соопшти денеска локалната мисија на светската организација, јави ДПА. 

Непознати напаѓачи синоќа истрелале ракети или минофрлачки гранати на кампот на мисијата на ОН (МИНУСМА) во северниот град Гао, при што загинал еден мировник, а повеќе од десет војници и вработени цивили се повредени. 

Малку подоцна во Гао, вооружени лица извршиле напад врз објектот на Координативниот центар на ОН за акција против мините (УНМАС), во кој загинале експерт за деактивирање на мините и двајца полицајци од локалните сили за безбедност. 

Пред околу две седмици петмина мировници на ОН беа убиени во северно Мали. 

Повеќе од 70 војници на ОН загинаа во Мали во последните три години.