Белград и Атина преговараат отворање на границите за вакцинираните

Грција и Србија се во разговори за билатерално воведување на вакциналани пасоши. Министрите за туризам на двете земји веќе го одржаа првиот видео состанок, но без конкретен договор.  На состанокот било разговарано од први мај до октомври да се отворат границите за туристите кои имаат потврда дека се вакцинирани против ковид, а се разгледувале и опции за оние кои нема да бидат имунизирани, а сакаат да летуваат во Грција. Сепак меморандумот не е потпишан, велат Грците. Белград се надева дека тоа наскоро ќе се случи.

Но за вакциналниот пасош не дискутираат само Грција и Србија. Романија веќе ги отвори границите за вакцинираните, а Кипар најави дека тоа ќе го направи од први март. И влијателниот Економист прогнозира дека ваквиот документ брзо ќе стане секојдневие без оглед на тоа што идејата е контрадикторна и многумина ја сметаат за дискриминирачка. Тоа е најбрз начин животот да се врати во нормала и да се избегнат скапите локдауни кои ја парализираат економијата, се вели во анализата. ЕУ и Велика Британија засега го отфрлаат овој  документ, но не и новиот американски претседател Бајден кој побара да се дебатира за идејата. Во исто време, некои приватни сектори почнаа со креирање на дигиталните вакцинални пасоши.