АПЕЛ ЗА ПОМОШ: Лечењето на синот кој има Леукопенија ги довело до работ на егзистенција и битка за парче леб

По телефонското јавување во склоп на нашата програма за потешкотиите и проблемите во кое се наоѓа семејството на Олгица Иванова од Штип, нашата екипа ги посети во нивниот дом.

Семејството на Олгица Иванова од Штип води вистинска битка за живот и преживување. Синот Емил има дијагноза Леукопенија, а процесот на лечење кој трае со години ги довел буквално до работ на егзистенција. 

Со оглед на дијагнозата и здравствените проблеми кои ги има синот Емил, лекарите му препорауваат здрава исхрана. Но како што вели неговата мајка Олгица, се она што лекарите го пропишуваат, тие може да го имаат на сон. А реалноста е парче леб доволно за да не се умре од глад. 

Секој месец е вистинска борба за егзистенција. Малите примања, трошоците за лекување како и ратите за кредит, ги доведуваат во ситуација најголемиот дел од месецот да преживуваат.

Финансиската немоќ ги донела во ситуации во неколку наврати да останат без струја, па така освен гладот и здравствените потешкотии, дополнителен проблем за нив знае да биде и мракот 

Синот Емил веќе долго време се бори со здравствените проблеми. Во повеќе наврати поднесувал барање за инвалидска пензија, но единстеваната поволност кој тој ја добил е одлука за задолжиелно пола работно време. 

Годините во кои буквално се борат за егзистенција, значеше и  влошување на условие во домот. студеното време и ветерот се нивен непријател со оглед на тоа дека преку скшените прозори им создава огромни проблеми и студ. 

Преголемиот напор и работите кои Олгица мора да ги врши доведоа до тоа и самата да има низа здравствени проблеми, за кои се потребни медицнски терпаии, но како таа вели, не паѓа ред да се лечи, затоа што ја чека гола борба за живот на синот и борба за преживување

За една мајка не постои полошо нешто од тоа да го гледа своето дете немоќно, а токму такво е секојдневието на Олгица Иванова од Штип. Истата упатува апел и молба за помош од сите добри луѓе.

По разговорот и посетата на семејството Иванови, ги контактиравме Општина Штип, од каде што искажаа спремност да помогнат. Семејството ќе поднесе барање за помош  до општината а до тогаш советниците во општианта здружено ќе соберат средства за набавка на основните продукти потребни за живот. 

Стапивме во контакт и со Пензиско инвалидскиот фонд кои се надлежни за регулирање на работниот однос на Емил,  од каде што добивме одговор:

„Во неколку наврати во изминатите години Емил Иванов поднесувал барања за инвалидска пензија, но и за скратено работно време. Од страна на Комисијата му е одобрена промена на работно место и скратено работно време. Иванов немал доволно стаж од минимум 12 години, што е еден од условите за добивање инвалидска пензија, покрај медицинскиот наод. Тој има закажан контролен преглед на 15 март 2022 година на кој Комисијата и стручните служби на Фондот на ПИОСМ-филијала Штип, ќе одлучат дали барателот се стекнал со сите услови за добивање на инвалидска пензија“.

Спремност и желба за помош покажаа и неколку хуманитани организации, секако можност да помогне има секој од нас, секој човек со добра волја.

Кирил Стојанов