Зголемен бројот на прегледи на детското одделение во штипската Клиничка болница

Зголемен е бројот на пациентите на Детското одделение во Клиничката болница во Штип. Началникот на одделението, Марина Гацова изјави дека бројот на пациенти е зголемен во изминатите десет дена, а причината се цревните вируси или бактериски цревни инфекции.

- На одделението ни доаѓаа дечиња со симптоми на цревни заболувања. Најчесто заболувањето почнува со повраќање и тоа неколку пати во текот на краток временски период, што доведува до влошување на состојбата на децата до нивна дехидрираност или пак она бледило и малаксаност. Во клиничката слика најчесто преовладуваат дијареи, кои траат неколку дена, пропратени со покачена температура или, пак, без температура, вели Гацова.

Таа забележува дека екстремните високи температури доведуваат до активирање на вирусите кои во текот на летото се присутни, а втората причина се и бактериските инфекции, кои се пренесуваат преку недоволно измиено овошје или раце. Советува веднаш кога ќе се појават овие симптоми, родителите да се обратат кај матичниот лекар, а на децата сами да не им даваат терапии или сокови кои може да ја влошат состојбата со цревниот вирус.

Педијатрите во Клиничката болница во Штип најмногу прегледи имаат во текот на викендите, кога матичните лекари не работат. Во текот на изминатиот викенд имале од 30 до 40 прегледи на деца од Штип и источниот регион, а во текот на работните денови имаат од 10 до 30 прегледи.