Земан би го поддржал Трамп за претседател на САД

Чешкиот претседател Милош Земан на американските претседателски избори би го поддржал републиканскиот кандидат Доналд Трамп, јави дописникот на МИА од Прага.

Земан во разговор за порталот Иднес.цз оценува дека демократската кандидатка Хилари Клинтон би продолжила по стапките на актуелниот претседател Барак Обама.

- Со цела почит за Барак Обама, неговото име е поврзано со многу неуспеси, тој успеа да го „растресе" целиот Блиски Исток, рече Земан. 
Тој додаде дека под раководство на Трамп, Соединетите американски држави би биле поинакви.

Потврдувајќи дека доколку би бил во можност би гласал за Трамп, Земан ги отфрли критиките за популизам или недостаток на искуство на републиканскиот кандидат.

- Кога се кандидираше Реган му се потсмеваа дека е само „глупав актер“ и дека од него ништо не може да се очекува, а тоа беше еден од најголемите американски претседатели, подвлече Земан.