Заев беше гостин на вториот натпревар „ГастроМак“ во Струмица

Премиерот Зоран Заев вечерва беше гостин на вториот Интернационален гастрономски натпревар - „ГастроМак“, чиј домаќин изминатите неколку денови беше градот Струмица, и на кој учествуваа околу триста натпреварувачи и гости од целиот свет, вклучувајќи ги САД, Индија, Пакистан, Велика Британија, Русија, Италија, како и од соседните земји Бугарија, Србија, Албанија и Грција.

Претседателот на Владата истакна дека оваа манифестација ги става Струмица и Македонија на светската гастрономска мапа, соопшти владината прес-служба.

Заблагодарувајќи им се на присутните, а особено на учесниците кои дојдоа од 30 земји, Заев истакна дека само со позитивен дух светот може да биде подобро место за живеење, а дел од него ќе бидат и Струмица и Македонија.

Премиерот на оваа манифестација ја врачи Гран-при наградата за најдобар готвач, а организаторите на „ГастроМак“ на Заев му врачија симболичен подарок, се додава во соопштението.

Манифестацијата „ГастроМак“ беше можност за запознавање на традициите и културите на другите народи. Овие манифестации и средби, во исто време, се значајни настани за воспоставување нови пријателства за подобри врски со другите народи и традиции.