Во Белград конференција „Western Balkans 2030“, меѓу учесниците потпретседателот на Владата Стоилковиќ, министерката Божиновска и министерот Муртезани

Потпретседателот на македонската Влада и министер за односи меѓу заедниците, Иван Стоилковиќ ќе престојува денеска во официјална посета на Србија, каде што ќе учествува на конференцијата „Western Balkans 2030“. Меѓу учесниците на конференцијата се најавени и министерката за енергетика, рударство и минерални суровини Сања Божиновска и министерот за европски прашања Орхан Муртезани.

Во своето обраќање на конференцијата министерот Стоилковиќ ќе истакне дека е чест и задоволство да се обрати на настан посветен на клучни теми кои ја отсликуваат реалноста и ја обликуваат иднината на регионот – регионалната интеграција, европската перспектива и економското поврзување.

Western Balkans 2030 е клучен регионален форум што ги обединува претставниците на европските институции, меѓународните организации и деловната заедница со цел заеднички да ги дефинираат насоките за развој на регионот до 2030 година. Фокусот е ставен на регионална интеграција, енергетска транзиција, дигитализација, одржлив раст и инвестиции. Организиран од списанието „Регион“ и поддржан од Европската инвестициска банка (ЕИБ) и Канцеларијата на Обединетите нации за проектни услуги (УНОПС), форумот ќе собере 80-100 учесници, вклучувајќи институционални партнери, лидери од приватниот сектор и претставници на регионалните медиуми.

Овогодинешната програма ќе вклучува панели посветени на регионалната интеграција и пристапувањето кон ЕУ, зелената транзиција и дигитализацијата. Учесниците на конференцијата ќе бидат претставници на европски институции, меѓународни и регионални организации, дипломатски и експертски заедници, како и водечки компании.

Поврзувајќи ги носителите на одлуки и експерти од Европа и Западен Балкан, конференцијата има за цел да го истакне потенцијалот на регионот да придонесе за создавање поконкурентна, одржлива и поврзана Европа.

Целта на организаторите е и да го воспостават „Западен Балкан 2030“ како годишен форум за дијалог и соработка и како место каде што идеите се трансформираат во конкретни акции и партнерства. 

Стоилковиќ ќе оствари и работна средба со потпретседателката на Владата на Србија и министерка за економија Адријана Месаровиќ со која ќе разговара за потпишување на меморандум за натамошно унапредување и продлабочување на економската соработка, поттикнување на заедничките инвестициони проекти, како и заеднички настап на трети пазари, во пресрет на македонско-српскиот бизнис форум што ќе се одржи во Македонија на 2 и 3 декември.

МИА