ВМРО-ДПМНЕ: Институциите да ги осудат антимакедонските изјави на официјални лица од Бугарија

ВМРО-ДПМНЕ бара македонските надлежни институции да реагираат на „антимакедонски, негаторски и понижувачки изјави на одредени официјални лица од Бугарија“. ВМРО-ДПМНЕ, како што велат од партјата останува на ставот дека Република Македонија треба да има добри односи со сите свои соседи, но без притоа да се задира во националната, јазичната и културната посебност на нашиот народ.

- Јавно и без срам во еден од своите настапи еден европратеник и еден директор на државна институција директно го навредуваат македонскиот народ, а од македонска страна нема никаква реакција. МАНУ упорно молчи на вакви суштински прашања, и отвора простор за нови напади и нови омаловажувања од страна. На ваквите напади каде е во прашање и угледот на државата, Министерството за надворешни работи не реагира, се брани со молк, се вели во соопштението од ВМРО-ДПМНЕ додавајќи дека МНР има обврска да го штити угледот на државата и македонскиот народ.

Според партијата, последен е нападот врз највисоката научна установа, која од директорот на Националниот историски институт во Бугарија била претставена како инструмент во рацете на Заев и не смее да се впушти во коментари на договорот кој е постигнат во Софија, особено на најавите за бришење на учебниците или тврдењата дека Македонија и Бугарија имаат заедничка историја.

- Претседателот на МАНУ, академикот Таки Фити е директно повикан да ги демантира овие тврдења, но МНР има обврска да побара да престанат омаловажувањата на македонската држава и институции, се вели во соопштението од партијата.