Велигден и Први мај го преполнија Дојран со туристи

Велигденскиот продолжен викенд и претстојните Првомајски празници го преполнија Дојран со гости од земјава, Грција, Србија и Бугарија кои ги запоседнаа комерцијалните и приватните капацитети, како и со еднодневни туристи чија бројка се движи околу десетина илјади.

Градоначалникот Анго Ангов, денеска потврди дека расположливите сместувачки капацитети на Дојран се речиси пополнети и дека има чувство оти Дојран дополнително се полни со гости, претежно млади, кои ќе го продолжат престојот во Дојран и за Први мај.

-Подготвено ги прифативме сите туристи кои од година во година се враќаат во се поголем број. Убавото сончево време го користат за прошетка по кејот, некои од нив и за сончање, а рестораните и кафулињата се грижат на гостите да им организираат разни забави и журки на плажа, изјави Ангов.

Според него, ако се суди по овој продолжен празничен викенд, годинашнава летна туристичка сезона на Дојранското Езеро ќе биде многу побериќетна од лани.